الشروگية ام جاسم تروي قصتها

عرفنا ام جاسم تلك المرأة الجنوبية التي تخدم سيد الشهداء وتقدم له الغالي والنفيس وتقدم اعز الاشياء الى الامام الحسين [ وما قصتها عندما اردت ذبح ابنها علي الصغير الا شاهداً على ذلك ] ،

قصتها الان كذلك في خدمة سيد الشهداء ولكن ليس في ايام عاشوراء ولا في طريق مشاية الاربعين بل مع المجاهدين الذين يسيرون على خطى سيدهم الحسين

ام جاسم تگول : كنت في كربلاء يوم ١٥ شعبان وحين انطه [ اعطى ] السيد الفتوى وگال هاي الخدمة [ خدمة المجاهدين ] مثل خدمة الأربعينية خدمة الحسين ، رحت لولادي وزرت الحسين ، ما زرت الحسين ما اروح اچذب گتله : سلام الله عليك ياسيدي ويامولاي با ابا عبد الله [ قصدها زارته من الخارج ولم تدخل للضريح ] ، سلام الله عليك يا ابا الفضل العباس ،
انا اعذروني ما اگدر اطبن اذا طبيت اتأخر ، وانا ماشيه للجهاد وانتم تعاونوني ، وانا الجهاد لا اندله ولا اعرفه بس انا ماشيه [ لچفچير الحسين ] ماشيه انطيهم هل تمنات ذني اشتغل بيهن جهاد للحسين لا احارب ولا غيره .
- اجيت لولادي كتلهم ياهو يمشي وياي ؟
- كالوا : وين تردين ؟
طبيت باليل الساعة بـ٣ باليل طبيت ، والساعة بـ١٢ طلعت من كربله باليلتها
طلعت الوادم ساعدوني ومحافظ الناصرية ساعدني واهل البصرة ساعدني ، الحمد لله ما ضل واحد ما ساعدني ، الوادم كلها ساعدوني .

سقطت قاعدة بلد وانا بيها ، ونوب طلعنا لـ [ ال ابو حشمة ] ...
ضليت ٣ اشهر وعشر ايام بقاعدة بلد ، صارت قاعدة بلد ولزموا الحمد لله وقبضوا رواتب وكامت اطب بيها ارزاق والسيارات گامت تمشي وانا وياهم ،
- شگالولي انوب گالولي : [ بجرف الصخر ] منتهين اولادچ ماكو اكل عدهم .
- گتلهم : انا رايحه ، حملت سيارتي وطلعت گبل لجرف الصخر ، حولت بنص جرف الصخر انا اويلادي ، والحمد لله هم كضينالنا شهرين بجرف الصخر ، هم تحرر وصار جرف النصر .

وين طلعت انوب ؟ طلعت للنخيب ... [ لم تتحمل عندما تذكرت تلك الايام فوضعت يدها على عيونها وقامت بالبكاء]

ضليت ٤٥ يوم بالنخيب ، والله وبالله بالسموم الحار واطبخ بكرفان يشهد الله ، وحسرة عليه لا شفت مروحة لا شفت مبردة ، مبردتي الطباخ ، مروحتي الطباخ ، وكله في سبيل الله وابن الزهرة ، انا امشي لابن الزهرة اخدم لابن الزهرة ، وين ما الكه خدمة لابن الزهرة انا اتبعها ، طلعت والحمد لله النخيب صار زين ، اجيت لسامره والحمد لله هاي صاري من العام والسنة [ لان التصوير قديم ] انا هاي كعدتي ، كل ٣ اشهر ، كل ٤ اشهر انزلي ٥ ايام ٦ ايام واجي .


ملاحظة : ام جاسم ، من اهالي الناصرية من عشيرة [ ال غزي ] .

وتستمر قصتها الي مدى الزمان لانه ام جاسم واحدة من تلك العاشقات اللتي عشقن سيد الشهداء ، واي عاقل يرى ما يرى منه ولا يعشقه ؟!